Қазақстан билігі бейбіт жиын өткізу және еркін пікір айту құқығын шектеп, індет кезінде де "өзгеше ойлайтындармен күресін" тоқтатпады. Бұл туралы халықаралық Amnesty International құқық қорғау ұйымының жаңа есебінде айтылған.

Штаб-пәтері Лондонда шоғырланған құқық қорғау ұйымы 7 сәуір күнгі есебінде 149 елдегі адам құқығының ахуалын баяндаған. Ұйым сарапшылары биліктің коронавирусқа байланысты енгізген шаралары Еуропа мен Орталық Азиядағы адам құқығына қауіп төндірді деп санайды. Құқық қорғаушылар мұндай жағдай онсыз да құқық аясы тарылып, теңсіздік бар елдерде жиіледі дейді.

Ұйым сарапшыларының тұжырымдауынша, бірқатар ел үкіметтері індетті "бостандықты шектеп, адам құқығы саласындағы міндеттемелерді ескермес үшін және өзінің ықпалын арттыратын құрал ретінде" пайдаланған. Түрлі шектеуші заңдар мен ережелер құқық қорғаушылар мен үкіметтік емес ұйымдардың қызметіне бөгет жасаған.

Amnesty International баяндамасына сәйкес, Қазақстан мен Өзбекстанда митинг туралы шектейтін заң жобалары қабылданып, өзгертілген. Қазақстан билігі "бұрынғыша бейбіт жиын мен пікір айту құқығын қатаң шектеп жатыр. Билік сыншылары саяси себеппен қудалауға ұшырады. Азаптау мен дөрекі қатынас кеңінен жайылған. Құқық қорғаушыларды тықсырып, "жала жабу" бабымен азаматтық жауапкершілікке тартты. ЛГБТ стигматизация және зорлық-зомбылыққа ұшырады, мүгедектігі бар адамдар өздерінің құқықтарын қорғау тетіктерінен айырылды. Пандемия салдарынан экономикалық жағдай нашарлағандықтан білім алу мүмкіндігі төмендеп, бала еңбегін қанау көбейді" делінген баяндамада.

Бұрынғы совет республикаларының билігі түрлі "жала жабу" кампаниялары арқылы үкіметтік емес ұйымдардың үнін өшіруге тырысты. Былтыр жыл соңында Қазақстанда адам құқығы мәселелері және тәуелсіз бақылаушылар дайындаумен айналысатын ондаған үкіметтік емес ұйым "қаржылық есептен қате жіберді" деп айыпталып, айыппұл салынды, кейбірінің жұмысы уақытша тоқтатылды. Халықаралық ұйымдардың қысымынан соң әкімшілік істер тоқтатылған. Баяндамада осы оқиға мысал ретінде келтіріледі.

Баяндамада былтыр алты түрме әкімшілігінің тұтқындардың құқығын қорғаумен танымал болған Елена Семенованың үстінен сотқа шағым түсіргені де айтылады. Олар құқық қорғаушыны түрмедегі "азаптау оқиғалары" жайлы ақпарат таратып, мекемелердің "беделіне нұқсан келтірді" деп айыптаған.

Жаңа есеп авторлары былтыр Қазақстанда қабылданған бейбіт жиын туралы жаңа заң халықаралық стандартқа сәйкес келмейді деп атап өтеді. Оған сәйкес, митинг өткізу үшін баяғыдай биліктің рұқсатын сұрау керек және оларды тек арнайы бөлінген жерлерде ғана өткізуге болады. Заңда азаматтығы жоқ, мүгедектігі бар адамдар және тіркелмеген ұйымдарды ашық алалау бар деп санайды құқық қорғаушылар.

Халықаралық құқық қорғау ұйымдары көп жылдан бері Қазақстан билігін "жала жабу" бабын декриминализациялауға шақырып келеді. Былтыр маусым айында "Жала жабу" бабы Қылмыстық кодекстен Әкімшілік кодекске ауыстырылған. Алайда билік оппоненттерін қудалап, жазалау үшін Қылмыстың кодекстің 274-бабы ("Көрінеу жалған ақпарат тарату") мен ондағы төтенше жағдайда қатысты тармақтарды өз мүддесіне пайдаланды дейді баяндама авторлары.

Құқық қорғау ұйымының мәліметінше, былтыр қаңтар мен тамыз аралығында 274-бабымен 81 қылмыстық іс қозғалған, бесеуі сотқа жеткен.

Баяндамада 2020 жылы 8 ақпанда Жамбыл облысы Қордай ауданы Масанчи, Сортөбе және Бұлар батыр ауылдарында болған ойран жайында да сөз болады. Бұл аумақтарда негізінен этникалық дүнгендер шоғырланған. Бұл оқиғаның салдарынан 11 адам (негізінен дүнгендер) қайтыс болған, жүздеген адам, оның ішінде 19 полицей жараланған. 20 мыңнан астам адам үйлерін тастап, қашуға мәжбүр болған.

Баяндама авторлары бүкіл аймақта этникалық және діни аз топтарға қысым көбейгенін атап өтеді. Қытай билігі Шыңжаңда ұйғырлар мен өзге де түркі тілді мұсылмандарды "тұрақты түрде қудалап жатыр". Ұйғырлар мен өзге де мұсылмандарды "сот шешімінсіз саяси үгіт-насихат лагерьлеріне қамап, мәдени тамырынан күшпен қол үзуге мәжбүрледі". Қытай билігі ұйғырлар және өзге де мұсылман топтарды, тибеттіктерді ығыстыруды ақтай сөйлеп, оны "экстремизм, терроризммен күрес шарасы" деп атаған.

Amnesty барлық елдерде-дерлік коронавирусты тежеу үшін төтенше жағдай енгізілгенін алға тартады. Алайда көп жағдайда шектеу шаралары адам құқығын бұзу құралы ретінде пайдаланылған. Кей жағдайда күштік құрылымдар карантин талаптарын күшпен орындауға мәжбүрлеген.

Бақылаушылар Бельгия, Грекия, Грузия, Испания, Италия, Қазақстан, Қырғызстан, Польша, Румыния және Францияда құқық қорғау орган өкілдерінің бейбіт демонстранттарға күш қолданғанын тіркеген. Әзербайжанда саяси себеппен қудаланғандар көбейгені байқалған.

ОҚИ ОТЫРЫҢЫЗ

АҚШ-тың адам құқығы есебінде Қазақстан жайлы не айтылған?

Қытайда жоғалған Әлімнұр Тұрғанбайдың әйелі Гүлдәрия Шеризат Алматы соты өзіне айыппұл салғанын хабарлады. Бір күн бұрын Гүлдәрия Шеризат бала-шағасымен әкімдік алдына барып, әкімнің шығуын талап етіп, күйеуін тауып беруге көмектесулерін сұраған. Бірақ айтуынша, оны полиция ұстап алып, бірнеше сағат полицияда ұстаған.

“Айыппұл төлейтіндей жағдайым жоқ, жолдасымды іздеймін бе, әлде айыппұлға ақша іздеймін бе? Оданша қанша тәулік болса да жатып, соны өтеп кетейін” десем “кәмелет жасқа толмаған балаңыз бар екен” дейді” деді ол 7 тамызда Азаттыққа.

Сот 6 тамызда онлайн өтіп, судья Алдабек оны “бейбіт жиын өткізу тәртібін бұзу” бабы (488-бап, 7-бөлік) бойынша кінәлі деп таныған.

Сот шешімінде Шеризаттың “Тәуелсіздік монументі алдында жолдасының суреттерін ұстап алып, рұқсатсыз шеру, пикет ұйымдастырғаны, осылайша бейбіт жиын өткізу тәртібін бұзғаны” жазылған. Сотта Шеризат тағылған айыпты мойындаған.

Оның Азаттыққа жіберген видеосында Шеризат пен балаларының әкімдік алдында Әлімнұр Тұрғанбайдың суретін ұстап тұрғаны көрінеді. Полиция және әкімдік өкілдеріне ұқсайтын азаматтық киім киген бірнеше адамның оған бұл шара "заңға қайшы екенін" айтып жатқаны көрінеді. Ал наразылар Қазақстан сыртқы істер министрлігінен қайран жоғын, енді амалсыздан әкімдікке келгендерін айтады. Полиция оларды сол жерден ұстап әкетеді.

Қытайда туып, Қазақстанға көшіп келіп, азаматтық алған Әлімнұр Тұрғанбай 23 шілде күні жұмыс бабымен Шыңжаңға кеткелі бері одан хабар-ошар жоқ. Қасында болған адамдар әйеліне "Қытай шекарасынан оны полиция ұстап әкетті" деп айтқан. Қазақстан мен Қытайдың ресми орындарына сұрау салған туыстары әзірге мардымды жауап алған жоқ.

Азаттық Қазақстан азаматы Әлімнұр Тұрғанбайдың Қытайда ұсталып, қамалды деген ақпараттың анық-қанығын сұрап Қазақстан сыртқы істер министрлігі мен Қытайдың Қазақстандағы елшілігіне ресми сауал жолдаған.

"Аталған азаматқа қатысты мәселе Қазақстан сыртқы істер министрлігінің бақылауында. Қытай тарабына тиісті сауал жіберілді. Ресми жауап түскен жағдайда ол туыстарына дереу жеткізіледі. Консулдық қызмет олармен тұрақты байланыста", – деп жазды Қазақстан СІМ 4 тамызда Азаттыққа жіберген жауабында.

Әлімнұр Тұрғанбайдың отбасы 1 тамыз күні Қазақстанның Қытайдағы елшілігінен хат алған. Онда елшілік биыл шілде айында Қытайға автокөлікпен шығып, содан хабар-ошарсыз кеткен Қазақстан азаматы Әлімнұр Тұрғанбайдың тағдырына алаңдап отырғанын айтып, оның қайда екенін анықтауға көмектесуді сұрап, Қытайдың сыртқы істер министрлігіне, Шыңжаң Ұйғыр автономиялық аймағы мен Іле Қазақ автономиялық облысының билік орындарына ресми хат жолдағанын хабарлаған.

Қытай Шыңжаң өлкесінде тұратын түркітілдес мұсылмандарды жаппай "лагерьлерге" қамап жатқаны алғаш рет 2017 жылы айтыла бастады. Кейін БҰҰ әлгі лагерьлерде миллионға жуық адам отырған болуы мүмкін деді. Осыдан соң халықаралық ұйымдар мен Батыс елдері Қытай билігінің аз ұлттарға қарсы жүргізіп жатқан саясатын "геноцид" деп атап, айыптады, санкция да жариялады. Алайда ресми Пекин мұны жоққа шығарып, Шыңжаңдағы саясатты "экстремизммен күрес", ал лагерьлерді "кәсіпке баулитын орталық" деп сипаттаған.

Ресми Астана Шыңжаңдағы қазақтар Қытай азаматы екенін алға тартып, бұл "Қытайдың ішкі ісі" деп, мәселеге тікелей араласа алмайтынын аңғартып келеді. Дегенмен Қазақстанның сыртқы істер министрлігі олардың арыз-шағымын қабылдап, дипломатиялық арналар арқылы тиісті хат, сұраныс жолдайды. Туыстарымен байланысуға көмектесеміз, жағдайды назарда ұстап отырмыз деп жауап береді.

Шымкентте әкімнің орынбасарына жасалған “қастандық ісі” бойынша сотта куәгерлер жауап берді. Берденовтің жүргізушісі Мейрамбек Калымбетов пен оқиғаны видеоға түсірген екі қыз бала сұралған. Бұл жөнінде “Курсив” жазды.

“Әкімдіктен 2-3 адам шыға бастаған кезде оқ атылды. Мен бірден полицияға хабарласып айттым. Соны айтамын дегенше тағы 3-4 рет оқ атылды. Осы кезде костюм киген ер адам (Берденов – ред.) жүгірді. Ал ана адам (Жиембай) оны қуды” деді куәгерлердің бірі Арайлым Қамытбек.

Дәл осы кезде Берденовтің жүргізушісі оны тұрақта күтіп тұрған. Оқ атылған кезде ол не істерін білмей қалған. Сотта Қалымбетов қай жақтан оқ атылып жатқанын білмегенін мойындады.

“Өз-өзіме келген кезде мына адамның (Жиембай) көліктің сол жағында тұрып, оқ атып жатқанын көрдім. Машина өзінен өзі сырғып кетіп барады, жолдың жиегіне тіреліп тоқтады. Көліктен шыққан кезде олар соғысып жатты. Көлікке қайта отырып, айналып, Жиембайды қақтым. Ол Руслан Арысбекұлын өлтіріп қоя ма деп қорықтым. Соққыдан кейін ол құлап, артқа қарай жүгіріп кетті. Біз жағаласып қалдық” деді Қалымбетов.

Екі қыз бен жүргізуші Берденовтің галстугымен қанды тоқтатуға тырысқан. Айтуларынша, ол кезде Берденов асфальтта дұға оқып жатты.

Бұл іс бойынша сот 6 тамызда Шымкентте басталған. Іс бойынша Шымкент әкімдігіне қарасты "Тұрғын үй Шымкент" компаниясының бұрынғы директоры Ернар Жиембайға "Адам өлтіруге оқталу" бабы бойынша айып тағылған. Ол Берденовті өлтіруге оқталғанын жоққа шығарады.

Сәрсенбі күні Ернар Жиембай сотта “қызғаныштан” эмоцияға беріліп, оқ атқанын, әйелінің Берденовпен жазысқанын көргенін, Берденовтің жұмыста дөрекілік танытып, намысына тиетін сөздер айтқанын жеткізген.

Ізінше Берденов сотталушының айтқандарын толық жоққа шығарып, "манипуляция" деп атаған. "Қақтығыстың түп-төркіні - кәсіби, қызметтік сипатта. Жауапкер келісім аясындағы жұмысын адал атқарғысы келмеді, есеп беруден жалтарды. Мен тек ашықтық пен міндеттемелердің орындалуын талап еттім" деп жазды Берденов желідегі парақшасында.

Ол денсаулығына байланысты сотқа бара алмағанын айтты.

Шымкент әкімінің орынбасары 40 жастағы Руслан Берденовке сәуір айында "қастандық жасалып", оқ тиген шенеунікке шұғыл ота жасалған еді. Оқиғаға не түрткі болғаны белгісіз.

Мамыр айында Берденов жағдайы тәуірлеп, қалыпты өмірге дайын екенін мәлімдеген. Маусымның соңында Respublica партиясының тең төрағасы қызметінен кеткені белгілі болды.

Алматылық "Қайрат" командасының 16 жастағы футболшысы Дастан Сәтпаев чемпиондар лигасында кезекті голын соқты. Словакиялық "Слован" командасына қарсы матчта оның соққан голы командаға жеңіс әперген, ойындағы жалғыз соққы болды.

Чемпиондар лигасының үшінші іріктеу кезеңінде алматылық "Қайрат" Орталық стадионында Братиславадан келген "Слован" командасымен ойнады. Ойыншылар допқа қатты таласқанмен қақпаға соққы жасау жағынан талпыныстары нәтижелі болған жоқ.

Екінші таймда дөрекі ойнағаны үшін Словакия құрамасының футболшысы екінші сары қағазын алып, алаңнан қуылды. Сан жағынан басымдыққа ие болған алматылықтар шабуылды үдетіп, бірінде пенальти соғу мүмкіндігіне қол жеткізді.

Алматылық командада тәжірибелі футболшылардың барына қарамастан пенальти соғу 16 жастағы Дастан Сәтпаевқа сеніп тапсырылды. Ол қарсылас жақтың қақпасына гол соқты. Осылайша матч 1 : 0 есебімен аяқталды, "Қайрат" ұтты.

Қосымша берілген уақытта Дастан Сәтпаев командасындағы Рикардиньоға доп беріп, ол қақпаға гол соқты, алайда видеоны қайталап көрген төреші голды есептемеді.

Қарымта матч 12 тамызда Братиславада өтеді.

Дастан Сәтпаев өзінің дебюттік матчында гол соғып, турнир тарихындағы ең жас гол иелерінің қатарына енген.

"Слованға" салынған гол – Сәтпаевтың чемпиондар лигасындағы үшінші соққысы.

Ресей президентінің сыртқы саясат жөніндегі көмекшісі Юрий Ушаков Мәскеу мен Вашингтон алдағы күндері "жоғары деңгейдегі кездесу өткізуге" келіскенін мәлімдеді. Қазір саммитке дайындық жүріп жатыр, орны таңдалған деді ол.

Путин мен Трамптың кездесуі мүмкін екені АҚШ президентінің арнайы уәкілі Стив Уиткоффтың Мәскеуге сапарынан кейін айтыла бастады. Америка ақпарат құралдары дереккөздерге сүйене отырып, кездесу келесі аптада өтуі мүмкін екенін жазған.

Ушаковтың сөзінше, саммитті өткізуді Америка жағы ұсынған. Ал Америка дереккөздері бұған лейін Путин мен Трамптың кездесуін Кремльдің өзі ұсынғанын жазған. АҚШ мемлекеттік хатшысы Марко Рубио бейсенбі күні Fox News арнасына саммит алдында Вашингтон мен Мәскеу "позицияларын толық пысықтап алуы керек" деді.

Ушаковтың сөзінше, Мәскеу әзірге үшжақты кездесуге – Путин – Трамп – Зеленский кездесуіне дайындалып жатпағанын айтты.

"Бұл нұсқа нақты талқыланған жоқ. Ресей жағы бұған түсініктеме бермеді" деді дипломат.

"Просто журналистика" YouTube-арнасы қалпына келтірілді деп хабарлады арна авторлары тәуелсіз журналистер Лұқпан Ахмедияров пен Рауль Упоров әлеуметтік желіде.

"Ұзақ үзілістен кейін біздің арнамыз ашылды. Арнамызды қайтарып алдық" деді желіде жарияланған видеода журналист Рауль Упоров.

Лұқпан Ахмедияровтың "Власть" басылымына айтуынша, 6 тамызда олар YouТube-тан арна қалпына келтірілгені жөнінде хат алған.

Шілде ортасында арна авторлары арнаға кибершабуыл жасалғаннан кейін "Просто журналистика" өшірілгенін хабарлаған еді. Журналистердің сөзінше, әлдекімдер арна қолданған Youtube-тің тегін музыкаларына авторлық құқықты өздеріне рәсімдеп, арнаға қарсы шағым жазған. Осылайша Youtube әкімшілігі арнаны өшірген.

«Бір қызығы «музыканың авторымыз-мыс» дегендер осыдан кейін Youtube-тан кеткен» деді журналист.

Ахмедияровтың сөзінше, журналистер шешімді апелляцияға берген, оларды Access Now ұйымы, "Шекарасыз тілшілер", "Журналистерді қорғау комитеті" қолдаған.

"YouTube бізге егер он күн ішінде бізге шағым түсіргендер арыз бермесе, дәлел жібермесе немесе сотқа шағымданбаса, арнаны қалпына келтіретінін айтып, хат жолдады. Он күн өтті, арнамызға қосылуға мүмкіндік берді" деді Ахмедияров.

ОҚИ ОТЫРЫҢЫЗ

Қазақстандық журналистерге қарсы кибершабуылдың артында кім тұр?

«Просто журналистика» – журналистер Лұқпан Ахмедияров пен Рауль Упоровтың коммерциялық емес жобасы. Ол өзекті қоғамдық-саяси мәселелерді қозғайды. Бұған дейін арна Қанды Қаңтар, жемқорлық, Украина, белсенділердің қудалануы және өзге де маңызды тақырыптарды қозғаған.

Қоғамдағы өзекті мәселелерді айтып жүрген журналист Лұқпан Ахмедияровтың өзі де бұған дейін талай рет әкімшілік-қылмыстық қудалауға ұшыраған. Биыл көктемде Ресейге жұмысқа кеткен бір топ қазақстандықты Украинадағы соғысқа мәжбүрлеп жіберуі мүмкін екені жөнінде ақпарат таратқан журналистке қарсы "Көрінеу жалған ақпарат тарату" бабы бойынша іс қозғалып, журналист қорғануға құқығы бар куәгер атанған.

Ахмедияровты биліктің кемшіліктер мен олқылықтарын сынап, жемқорлық пен жең ұшынан жалғасуды әшкерелейтін материалдары үшін бірнеше рет шенеуніктер сотқа да берген, сондай-ақ билік оны қоғамдық-саяси белсенділігі үшін де бірнеше рет жауапқа тартқан.

Ресей Украинаға қарсы басқыншылық соғыс ашқаннан кейін Лұқпан Ахмедияров пен Рауль Упоров Украинаға барып, соғыс қасіретін тартып жатқан халықтың азаттық пен тәуелсіздік жолындағы күресін, бір сәтте бейбіт өмірі тас-талқан болған қарапайым адамдардың өмір тынысы жайлы тізбекті хабарлар дайындап, қазақстандық көрерменге жеткізген.

Олар бірігіп Қанды Қаңтар туралы екі бөлімнен тұратын деректі фильм шығарған. Ахмедияровтың айтуынша, фильм жеке адамдардың қаржысына екі жыл бойы Қазақстанның 12 қаласында түсірілген.

2012 жылы Лұқпан Ахмедияровқа қастандық жасалды. Қылмыскерлер оны травматикалық қарудан екі рет атып, кеуде тұсынан 8 рет пышақ салған. Подъезге жасырынып үлгерген журналист жылдам көмекке келген адамдардың арқасында аман қалған.

Ахмедияров кәсіби қызметі үшін бірнеше сыйлықтың, соның ішінде халықаралық жүлденің иегері атанған.

Тәжікстан экономикалық даму және сауда министрі Завки Завкизода Тәжікстанның Еуразия экономика одағына (ЕАЭО) қосылу мәселесін ведомствоаралық жұмыс тобы қарап жатыр деп мәлімдеді. Оның сөзін "Азия-Плюс" телеграм-арнасы келтірді.

"Жұмыс тобы ғаламдық экономиканың ахуалын, әлемдегі геосаяси жағдайдың шиеленісуі және өзге де сыртқы факторларды ескере отырып жағдайды жан-жақты талдап жатыр. Бұған қоса, одақ елдеріне ұқсас елдердің тәжірибесіне де сүйенеді, кейін қорытындысын таныстырады" деді Завки Завкизода.

Завкизоданың сөзінше, қазіргі кезде жұмыс тобы әлі ешқандай қорытынды жасамаған.

Ол осыған ұқсас мәлімдемені 2021 жылы да жасаған. Ол кезде "ЕАЭО - едәуір жас бірлестік және кез келген ел қандай да бір одаққа кірмес бұрын артықшылықтары мен кемшіліктерін бағамдайды" деп айтқан.

Бұған дейін Ресей әртүрлі мінберлерде Тәжікстанның ЕАЭО-ға қосылуға ниетті екенін мәлімдеген. Тәжікстан билігі Ресейдің үндеулерінен ашық бас тартқан жоқ, тек жалтарма жауап берумен келеді.

Еуразия экономика одағы 2015 жылдың 1 қаңтарынан бастап ресми түрде жұмыс істей бастады. Оған Ресей, Беларусь, Қазақстан, Армения мен Қырғызстан мүше. Одақ құжаттарына сәйкес, ЕАЭО аймағында тауар қозғалысы, сонымен бірге қызмет көрсету, капитал, жұмыс күші еркін айналуы керек. Тараптар бір-бірімен ақылдаса отырып бірыңғай саясат жүргізуі керек. Алайда оған мүше кейбір елдердің ресми өкілдері ЕАЭО кеңістігінде тауар мен қызмет көрсету бойынша бәсекелестік шарттары тең емес екендігіне шағымданады.

Сәуір айында “қастандық жасалған” Шымкент әкімінің орынбасары Руслан Берденов Facebook-та жазба жариялап, 6 тамызда процесс кезінде сотталушы айтқан тұжырымдарды жоққа шығарды.

Сотталушы Ернар Жиембай бір күн бұрын сотта “қызғаныштан” эмоцияға беріліп, оқ атқанын, әйелінің Берденовпен жазысқанын көргенін, Берденовтің жұмыста дөрекілік танытып, намысына тиетін сөздер айтқанын жеткізген. Бұған қоса, Жиембайдың сөзінше, Берденов оған “Шымкент әкімі мені киллер ретінде жалдады деп айтсаң кешіремін” деген.

Берденов желідегі жазбасында мұның бәрін жоққа шығарды, бірақ Жиембаймен жанжал болғанын растаған.

“Қақтығыстың түп-төркіні - кәсіби, қызметтік сипатта. Жауапкер келісім аясындағы жұмысын адал атқарғысы келмеді, есеп беруден жалтарды. Мен тек ашықтық пен міндеттемелердің орындалуын талап еттім. Ал қоғам назарын «қызғаныш», «жеке қатынас», «жұбайы» секілді жалған себептерге бұру - манипуляция, шындықтан алыстату. Мен оның жұбайын да, отбасын да танымаймын. Ол мен үшін тек мердігер болатын” деп жазды.

Берденов қала әкіміне қатысты тұстарды да жоққа шығарды.

“Бұдан да сорақысы – бүгінде бұл жалған мәлімдемелерге қала әкіміне қатысты тұстарды да қосып жатыр. Бұл тағы да істің ақиқатқа емес, қысым көрсету мен беделге нұқсан келтіруге бағытталған өрескел манипуляция екенін дәлелдейді. Мен мұндай мәлімдемелерді үзілді-кесілді жоққа шығарамын және оларды мойындамаймын” деп жазды Берденов.

Бір күн бұрын Шымкентте әкімнің орынбасары "Руслан Берденовке жасалған қастандық ісі" бойынша негізгі сот басталған. Іс бойынша Шымкент әкімдігіне қарасты "Тұрғын үй Шымкент" компаниясының бұрынғы директоры Ернар Жиембайға "Адам өлтіруге оқталу" бабы бойынша айып тағылған.

Сот процесі барысында Ернар Жиембай шенеунікке оқ ату себебін түсіндірген еді.

"Себептердің бірі - қызғаныш. Жұбайым Берденовтің туыстарымен араласады және үнемі оны үлгі ететін. "Оның бұлшықеттері бар, костюмі қандай әдемі, қымбат" деп. Жұмыста да үнемі қысым жасалатын, намысқа да тиді. Жұбайым ажырасамын деп сотқа арыз түсірді. Берденов оған үнемі лайк басатын. Комплимент жазды" деді Ернар Жиембай сотта.

Жиембай сонымен бірге сотта Руслан Берденов өзін кешіретінін, бірақ ол үшін шарт қойғанын айтқан.

"Егер мен сотта әкім Ғабит Сыздықбеков (қазіргі Шымкент әкімі) мені киллер ретінде жалдады деп айтсам, Берденов мені кешіретінін айтты" деді Жиембай.

Сот талабына қарамастан Берденовтің сөзі сот отырысына қатыспады. Оның өкілдері шенеуніктің емделіп жатқанын айтқан.

Бұған дейін прокурор “күдікті өзінің жұмыстан айырылатынын білгеннен кейін “кек алу” мақсатында оқ атты” деп айтқан еді.

Ернар Жиембай сотта өзіне тағылған "Адам өлтіруге оқталу" бабымен келіспейтінін, аңшы мылтығымен шенеунікті әншейін қорқытқысы келгенін, өлтіруге оқталмағанын айтты.

Шымкент әкімінің орынбасары 40 жастағы Руслан Берденовке сәуір айында "қастандық жасалып", оқ тиген шенеунікке шұғыл ота жасалған еді. Оқиғаға не түрткі болғаны белгісіз.

Мамыр айында Берденов жағдайы тәуірлеп, қалыпты өмірге дайын екенін мәлімдеген. Маусымның соңында Respublica партиясының тең төрағасы қызметінен кеткені белгілі болды.

АҚШ президенті Дональд Трамп Ресей басшысы Владимир Путин және Украина президенті Владимир Зеленскиймен "кездесуге ашық".

"Ресейліктер президент Трамппен кездесуге ниет білдірді және президент Путинмен де, Зеленскиймен де кездесуге ашық" деді Ақ үйдің баспасөз хатшысы Каролайн Ливитт.

Fox News тілшісі Питер Дусидің сөзінше, Путин Кремльде болған АҚШ-тың арнайы уәкілі Стив Уиткоффқа Трамппен кездескісі келетінін айтқан, Уиткофф мұны АҚШ президентіне жеткізген.

Трамптың өзі Ақ үйдегі брифинг кезінде "кездесу жақында өтуі әбден мүмкін" деді. Ол Украинадағы соғыс қалай аяқталуы мүмкін деген сұраққа нақты жауап бермеді. Трамптың сөзінше, Ресей мұнайын сатып алатын Үндістан мен өзге елдерге қарсы жанама санкция салынуы мүмкін. Арасында Қытай да бар.

"Менің арнайы уәкілім Стив Уиткофф қазір ғана Ресей президенті Владимир Путинмен өнімді кездесу өткізіп келді. Едәуір ілгерілеушілік бар. Осыдан кейін мен Еуропадағы кейбір әріптестеріме хабар бердім. Барлығы соғыс аяқталғанын қалайды және алдағы күндері мен апталарда соған күш саламыз" деп жазды Трамп сәрсенбі күні Truth Social желісінде.

Азаттықтың еуропалық дипломаттар арасындағы дереккөз "Трамп пен Путиннің кездесуіне дайындық жүріп жатқан сияқты" деді. Дереккөздерге сүйенген NYT та мұндай кездесу "келесі аптада өтуі мүмкін" деп жазды.

Трамп пен Путиннің кездесу орны әзірге белгісіз. Олар Катар немесе Швейцарияда кездесуі мүмкін. CNN дереккөздері екі басшының саммитін қысқа уақыт аралығында ұйымдастыру салу оңай емес деп санайды.

AFP-дің жазуынша, Путин мен Уиткоффтың кездесуіне арналған әңгімеге Трамп пен Зеленскийден бөлек НАТО бас хатшысы Марк Рютте, Германия канцлері Фридрих Мерц, Ұлыбритания премьер-министрі Кир Стармер және Финляндия президенті Александр Стубб қатысқан.

Bild дереккөздерінің мәліметінше, Трамп Путин мен Уиткоффтың келіссөзін "күткеннен де әлдеқайда өнімді болды" деп бағалаған.

NYT жазуынша, Путинмен кездесуден кейін Трамп Путин және Зеленский қатысатын үшжақты кездесуді де өткізуді жоспарлап отыр. Бұл кездесуге Еуропа елдерінің басшылары қатыспайды деді басылым дереккөзі. НАТО және Украина өкілдері бұл мәліметті растаудан бас тартқан.

Штаб-пәтері Дублинде орналасқан ирландиялық Front Line Defenders құқық қорғау ұйымы белсенді Марат Жыланбаевтың денсаулығы туралы жазба жариялап, дабыл қаққаннан кейін әкімшілік жазаға тартылған құқық қорғаушы Бақытжан Төреғожинаға шыққан сот шешімін айыптап, Қазақстан билігін шешімнің күшін жоюға шақырды. Құқық қорғау ұйымының мәлімдемесі 5 тамызда жарияланды.

"Әлеуметтік желіде пікір айту еркіндігін пайдаланғаны үшін құқық қорғаушыларды бұлыңғыр жазылған заңды пайдалана отырып жазалау іс жүзінде цензурамен пара-пар және Қазақстандағы азаматтық кеңістікке теріс әсері етеді. Мұндай әрекеттер адам құқығы туралы тәуелсіз ақпаратқа қолжетімділікті шектейді және елдегі пікір айту еркіндігіне нұқсан келтіреді" деп жазылған ұйымның мақаласында.

Құқық қорғау ұйымы Қазақстан билігін Бақытжан Төреғожинаны сотпен қудалауды дереу тоқтатып, оған шыққан сот шешімінің күшін жоюға шақырған.

БҰҰ-ның құқық қорғаушылардың мәселесі жөніндегі арнайы баяндамашысы Мэри Лоулор да Facebook желісінде жағдайға алаңдаушылық білдірді.

"Бұл – адам құқығы қорғау қызметі үшін кек алу" деп жазды Мэри Лоулор.

Өткен аптада "Ар.Рух.Хақ" қоғамдық қорының жетекшісі, құқық қорғаушы Бақытжан Төреғожинаны Алматы әкімшілік соты "жалған ақпарат тарату" бабы бойынша кінәлі деп танып, 78 мың теңге (шамамен 144 доллар) айыппұл салған. Құқық қорғаушы өзіне тағылған айыптарға келіспеген.

Әкімшілік іске құқық қорғаушының түрмеде аштық жариялаған саяси белсенді, марафоншы Марат Жыланбаевтың денсаулығы нашарлап кеткені жайлы жақында әлеуметтік желіде жазған посты себеп болған. Ол жазбада Төреғожина Жыланбаевты "терісінің түсі өзгерген, есінен танып қала жаздайды", салмағы 45 келіге дейін кеміп кеткен деп сипаттаған.

Алайда бұл ақпаратты кейін Қылмыстық-атқару жүйесі комитеті (ҚАЖК) теріске шығарған. Ал адам құқықтары жөніндегі уәкіл Артур Ластаев белсендінің денсаулығы күрт нашарлады деген сөздерді "хайп" деп атаған.

"Біз облыстық денсаулық сақтау басқармасымен үнемі байланыстамыз. Сондықтан оның "халі ауыр", ол "45 кг болып, талып қалуға шақ қалыпты" деген сөздердің ешқандай объективті негізі жоқ және олар дәлелденбеген. Азаматтың, әсіресе жазасын өтеп жатқан адамның денсаулығына қатысты хайп жасау құқықтық тұрғыдан дұрыс емес, ал М.Жыланбаевтың туыстары мен жақындарының алдында адамдыққа жатпайтын әрекет деп санаймын" деді Ластаев.

29 шілдеде Қазақстанның Адам құқықтары жөніндегі уәкілінің жанындағы үйлестіру кеңесінің хатшысы Раиса Шер Ақмола облысы Степногорск қаласындағы №4 түзету мекемесінде жазасын өтеп жатқан Марат Жыланбаевтың фотоларын жариялады. Оның айтуынша, Ақмола облыстық денсаулық сақтау, санитарлық-эпидемиологиялық бақылау басқармаларының өкілдерімен бірге олар жазасын өтеушінің жағдайымен танысып, өзімен сөйлескен.

Сот кезінде қорғау жағы әкімшілік істі қозғауға түрткі болған хаттама дұрыс толтырылмағанын, материалдар болжамға негізделгендіктен сотта дәлел ретінде қолданылмауға тиіс екенін айтты.

Ал рапортты толтырған Алмалы аудандық полициясының учаскелік инспекторы Мұхит Тойбаев сот кезінде Төреғожинаның жазбасы “фактіге негізделмегенін”, “қылмыстық-атқару жүйесінің беделіне нұқсан” келтіретінін айтты.

Төреғожина өтініш беріп, Марат Жыланбаевтың өзін сот процесіне қатыстыруды, осылайша белсендіге барлық сұраққа өзі жауап беру мүмкіндігін беруді сұраған. Бірақ судья өтінішті қанағаттандырмады.

Құқық қорғаушы шешімді апелляцияға беретінін айтқан.

Павлодар облысында "Богатырь Көмір" карьерінде бір жұмысшы қаза болды. Orda-ның жазуынша, оқиға 5 тамызда болған.

Компанияның хабарлауынша, 5 тамызда тартушы агрегат жүргізушісін тоқ соғып, қаза болған. Оқиға орнына жедел жәрдем көлігі барғанға дейін ер адам сол жерде жан тапсырған.

Мемлекеттік еңбек инспекциясы комитетінің дерегінше, қаза болған адам 42 жаста. Оқиғаны арнайы комиссия тергеп жатқаны хабарланды. Сот-медицина сараптамасы тағайындалған.

Кәсіпорын өкілдері марқұмның отбасына барлық көмекті беруге уәде берген.

Бірнеше күн бұрын ғана осы карьерде 32 жастағы электр слесары өндіріс кезінде ауыр жарақаттанғанын жергілікті БАҚ жазған. Ол биіктен құлаған. Мемлекеттік инспекция комитеті тексеріс бастағанын хабарлаған.

"Богатырь Көмір" кәсіпорнының әлеуметтік есебіне сәйкес, кейінгі үш жылда кәсіпорында өндіріс кезінде кемінде алты адам қаза болған.

"Богатырь Көмір" – қазақстандық «Самұрық-Қазына» ұлттық әл-ауқат қоры мен ресейлік «РусАл» компанияларының біріккен кәсіпорны. 2002 жылы компания Қазақстан үкіметімен «Богатырь» және «Северный» кеніштерінің құрамындағы Екібастұз көмір кен орнын 45 жыл игеру туралы келісім-шартқа отырған. Компания үлесіне Екібастұз көмір алабында өндірілетін көмірдің барлық көлемінің 70%-ы тиеді.

Шымкентте әкімнің орынбасары "Руслан Берденовке жасалған қастандық ісі" бойынша негізгі сот басталды. Іс бойынша Шымкент әкімдігіне қарасты "Тұрғын үй Шымкент" компаниясының бұрынғы директоры Ернар Жиембайға "Адам өлтіруге оқталу" бабы бойынша айып тағылған.

ҚазТАГ-тың жазуынша, сот процесі барысында Ернар Жиембай шенеунікке оқ ату себебін түсіндірген.

"Себептердің бірі - қызғаныш. Жұбайым Берденовтің туыстарымен араласады және үнемі оны үлгі ететін. "Оның бұлшықеттері бар, костюмі қандай әдемі, қымбат" деп. Жұмыста да үнемі қысым жасалатын, намысқа да тиді. Жұбайым ажырасамын деп сотқа арыз түсірді. Берденов оған үнемі лайк басатын. Комплимент жазды" деді Ернар Жиембай сотта.

Ол сотта Берденовтің жұмыста өте дөрекі сөйлеп, намысына тиетінін айтқан.

ҚазТАГ-тың жазуынша, Жиембай сонымен бірге сотта Руслан Берденов өзін кешіретінін, бірақ ол үшін шарт қойғанын айтқан.

"Егер мен сотта әкім Ғабит Сыздықбеков (қазіргі Шымкент әкімі) мені киллер ретінде жалдады деп айтсам, Берденов мені кешіретінін айтты" деді Жиембай.

Сот талабына қарамастан Берденовтің сөзі сот отырысына қатыспады. Оның өкілдері шенеуніктің емделіп жатқанын айтқан.

Сотта Берденовтің мүддесін қорғаушылар Жиембайдың сөзіне қатысты не деп жауап бергені әзірге белгісіз.

Бұған дейін прокурор “күдікті өзінің жұмыстан айырылатынын білгеннен кейін “кек алу” мақсатында оқ атты” деп айтқан еді.

Ернар Жиембай сотта өзіне тағылған "Адам өлтіруге оқталу" бабымен келіспейтінін, аңшы мылтығымен шенеунікті әншейін қорқытқысы келгенін, өлтіруге оқталмағанын айтты.

Шымкент әкімінің орынбасары 40 жастағы Руслан Берденовке сәуір айында "қастандық жасалып", оқ тиген шенеунікке шұғыл ота жасалған еді. Оқиғаға не түрткі болғаны белгісіз.

Мамыр айында Берденов жағдайы тәуірлеп, қалыпты өмірге дайын екенін мәлімдеген. Маусымның соңында Respublica партиясының тең төрағасы қызметінен кеткені белгілі болды.

АҚШ президентінің арнайы уәкілі Стив Уиткофф сәрсенбі күні Мәскеуде Ресей президентінің арнайы өкілі Кирилл Дмитриевпен кездесті. Олардың Кремльдегі саябақта кетіп бара жатқаны көрінетін видеоны ресейлік мемлекеттік ақпарат құралдары жариялады.

Уиткофф Мәскеуге сәрсенбі, 6 тамызда таңертең келген. Оның ұшағы Внуково әуежайына қонды. Ол бүгін Ресей президенті Владимир Путинмен кездеседі деген болжам бар. Кремль ақпаратты ресми түрде растамады.

Трамп өкілі АҚШ президентінің Мәскеуге қойған ультиматумының мерзімі аяқталайын деген шақта Ресейге барып отыр. Трамп Ресейден Украинадағы атысты дереу тоқтатуды талап еткен, талабы орындалмаса, ресейлік тауарлар мен Ресеймен сауда-саттық жасайтын елдердің тауарларына жүз пайыздық баж салығын енгізетінін ескерткен.

Сейсенбі күні Трамп журналистерге баж салығы міндетті түрде 100 пайыз болады деп ескертпегенін жеткізді. Оның сөзінше, жаңа шектеу туралы түпкілікті шешім Уиткоффтың Мәскеуге сапарынан кейін қабылданады. Ол Украинадағы соғысты тоқтатудан әлі де үмітті.

"Кейінгі бес айда бес соғысты тоқтаттым. Алтыншысы осы болғанын қалар едім" деді сейсенбі күні ол журналистерге.

Вашингтон Мәскеу мен Киевтен атысты шартсыз тоқтатуды талап етеді. Украина президенті Владимир Зеленский мамырдан бері соған дайын екенін айтып келеді. Ресей атысты тоқтату үшін бірқатар шарт қойған, арасында үзіліс кезінде Украинаға қару-жарақ жеткізбеу туралы талап та бар.

Еуроодақ Қытайға санкция салуға дайындалып жатыр деп жазды Politico. Брюссельдегі дипломатиялық дереккөзге сүйенген басылым бұған Пекиннің Ресейдің Украинаға қарсы ашқан соғысын қолдауы себеп болып отырғанын атап өтті.

Шілде айында Reuters "өнеркәсіптік тоңазытқыш қондырғыларын тасымалдайтын" жалған компаниялар Ресейге дронға арналған қытайлық қозғалтқыштарды жасырын тасымалдағанын жазған еді.

Politico-ның дереккөзі Reuters мәліметінің "анық" екенін және нақты жағдайда Қытайдың "рөлі күшейгенін" айтқан.

"Қытай қолдамағанда қазір соғыстағы ахуал мүлде басқаша болар еді" деді дереккөз.

Еуроодақтың 15 елі аталған мәліметтерді алға тартып, Пекиннен түсініктеме сұраған. Қытай не өзінің қатысы барын жоққа шығарған немесе түсініктемеден мүлде бас тартқан.

Санкция тамыздан кейін салынады деп жоспарланып отыр. Дегенмен ЕО елдері Пекинмен диалогтан да мүлде бас тартып отырған жоқ.

"Коммерсант"-тың жазуынша, ЕО-ның шілде айында мақұлданған Ресейге қарсы 18-санкция пакетінде Ресеймен сауда жасаған жеті қытайлық компанияның аты аталады. Бұған қоса, қытайлық Suifenhe Rural Commercial Bank және Heihe Rural Commercial Bank банктері де бар. Қытай билігі айыптауларды негізсіз деп атап, өзінің құрылымдарының құқықтары мен мүддесін қорғау үшін жауап беретінін айтқан.

"Ар.Рух.Хақ" қоғамдық қорының жетекшісі, құқық қорғаушы Бақытжан Төреғожина түрмедегі оппозиция белсендісі, марафоншы Марат Жыланбаевты ауруханаға жатқызуды талап етті.

Құқық қорғаушының сөзінше, Марат Жыланбаевтың аштық ұстап жатқанына 6 тамызда 66 күн болған. Ол белсендінің денсаулығы нашарлағын айтып, оны ауруханаға жатқызып, толық медициналық тексерістен өткізуді талап етті.

Оның сөзінше, 5 тамызда адвокат Денис Малюга Жыланбаевқа кіріп шыққан. Құқық қорғаушы Жыланбаевтың өтінішімен оның қан талдауының көрсеткішін желіде жариялап, белсендінің аяқ сіңірі тартылып, қабырғасы ауыратынын және өзге де симптомдар барын жеткізді.

“Бұған қоса, Марат Жыланбаев БАҚ және халықаралық ұйым өкілдерімен кездесу туралы өтініш жазды. Өтінішті мекеме тіркеді. Адвокат Денис Малюгада тіркелген өтініштің нөмірі бар. ЕО, Ұлыбритания және АҚШ, норвегиялық Хельсинки комитетінің Қазақстандағы өкілі, Human Rights Watch-ты Марат Жыланбаевқа кіріп кірулерін сұраймыз” деп жазды.

Құқық қорғаушы жазбада ресми омбудсмендерден қайран жоғын да меңзеген.

Қылмыстық-атқару жүйесі комитеті және Степногорскідегі түрме өкілдері әзірге реакция білдірмеді. Қылмыстық атқару-жүйесі департаментінің баспасөз хатшысы Ирина Горнова 6 тамызда Азаттық тілшісіне демалыста жүргенін айтып, ақпаратты анықтап көретінін айтты.

Бұған дейін ҚАЖК Жыланбаевтың халі мүшкіл деген ақпаратты жоққа шығарған. Ал адам құқықтары жөніндегі уәкіл Артур Ластаев белсендінің денсаулығы күрт нашарлады деген сөздерді "хайп" деп атаған.

"Біз облыстық денсаулық сақтау басқармасымен үнемі байланыстамыз. Сондықтан оның "халі ауыр", ол "45 кг болып, талып қалуға шақ қалыпты" деген сөздердің ешқандай объективті негізі жоқ және олар дәлелденбеген. Азаматтың, әсіресе жазасын өтеп жатқан адамның денсаулығына қатысты хайп жасау құқықтық тұрғыдан дұрыс емес, ал М.Жыланбаевтың туыстары мен жақындарының алдында адамдыққа жатпайтын әрекет деп санаймын" деді Ластаев.

29 шілдеде Қазақстанның Адам құқықтары жөніндегі уәкілінің жанындағы үйлестіру кеңесінің хатшысы Раиса Шер Ақмола облысы Степногорск қаласындағы №4 түзету мекемесінде жазасын өтеп жатқан Марат Жыланбаевтың фотоларын жариялады. Оның айтуынша, Ақмола облыстық денсаулық сақтау, санитарлық-эпидемиологиялық бақылау басқармаларының өкілдерімен бірге олар жазасын өтеушінің жағдайымен танысып, өзімен сөйлескен.

"Өзінің айтуынша, оның халі жақсы, денсаулығына қатысты еш шағымы жоқ. Бұған қоса ол тұрақты түрде спортпен шұғылданады, соның ішінде өзі ұнататын спорт түрі – жүгірумен де айналысады, кітапханаға барып, кітап оқиды" деп жазды Шер Facebook-тегі парақшасында.

Бірақ фотода ол қырынан және арқа жағынан ғана түсірілген, видео жоқ. Кейбір қолданушылар бұл суреттерден адамның жағдайын бағалау мүмкін емес екенін айтып, Жыланбаевтың видеосын жариялауды және оған тәуелсіз құқық қорғаушыларды кіргізуді талап еткен. ҚАЖК бұл талапқа реакция білдірген жоқ.

Жыланбаевтың ахуалы жайлы дабыл қаққан құқық қорғаушы Төреғожинаға 31 шілдеде 78 мың теңге айыппұл салынды. Оған "жалған ақпарат таратты" деген айып тағылды. Ал құқық қорғаушы айыпқа келіспеді. Халықаралық ұйымдар шешімді сынады.

• 61 жастағы Марат Жыланбаев – Гиннестің рекордтар кітабына енген жеті рекордтың иегері атанған ультрамарафоншы ретінде көпке танылған. Ол тіркелмеген оппозициялық "Алға, Қазақстан!" партиясының бастамашыл тобының жетекшісі болған. 2023 жылдың көктемінде белсенді қамауға алынып, оның ісін жабық қараған Астана соты сол жылы қарашада Марат Жыланбаевты "экстремистік ұйым ісіне араласты" және "экстремизмді қаржыландырды" деген айып бойынша жеті жылға бостандығынан айырған.
• Соттың ұйғарымы бойынша Жыланбаев: "Қазақстанның демократиялық таңдауы" қозғалысы экстремистік ұйым деп танылғанын біле тұра Астана қаласы аумағында "ҚДТ" ұйымының қызметіне белсенді түрде араласып, Мұхтар Әблязов ұйымдастырған заңсыз митингілерге қатысқан. Сонымен қатар, Әблязов пен және оның шетелдегі штабымен байланыс орнатып, олардың Конституциялық құрылымды күштеп өзгертуді көздейтін тапсырмаларын орындаған. 2021 жылы Жыланбаев М.Т. қоғамға қауіпті салдарды түсіне отырып, Әблязовтың тапсырмасын орындап, Астана қаласындағы Республика даңғылында орналасқан ашаршылық құрбандарына арналған ескерткішке келіп, "ҚДТ" ұйымының қызметін насихаттаған. 2022-2023 жылдары Жыланбаев М.Т. "ҚДТ" қызметінің экстремистік сипатын біле тұра, басқа адамдармен сөз байласып, оған ақпараттық, қаржылық және өзге де көмек көрсеткен. Әлеуметтік желіде ұйымды қаржыландыруға және оған қосылуға шақырған". Сот оны қоғамнан оқшаулап қана түзетуге болады деген ұйғарымға келген.
• Жыланбаев пен оның жақтастары тағылған айыптарды саяси астары бар деп жоққа шығарды.
• 2018 жылы Қазақстан соты ҚДТ қозғалысын "экстремистік ұйым" деп танып, қызметіне тыйым салған. Ал Еуропарламент 2019 жылы наурызда қабылдаған қарарында ҚДТ-ны "бейбіт оппозициялық ұйым" деп атаған.
• Қазақстандық құқық қорғаушылар биліктің саясатын қатты сынайтын Марат Жыланбаевты "саяси тұтқындар" тізіміне қосқан. Ресми Астана елде саяси тұтқын жоқ, ешкім саяси ой-пікіріне бола қудаланбайды дейді.

АҚШ президенті Дональд Трамп мұнайдың арзандауы Ресейді Украинаға қарсы соғысты тоқтатуға мәжбүрлей алады.

"Егер мұнай қатты арзандаса, Путин адам өлтіруін тоқтатады. Егер мұнайдың баррелі тағы 10 долларға арзандаса, онда таңдау да қалмайды, себебі [Ресей] экономикасының ахуалы өте нашар" — деді Трамп CNBC News эфирінде.

Трамп сонымен бірге Ресей мұнайынан бас тартпаған Үндістанға баж салығын едәуір көбейтетінін және Брюссель Америка экономикасы алдындағы міндеттемелерін орындамаса, ЕО-ға 35 пайыздық баж салығын енгізетінін айтты.

5 тамызда Лондонның ICE биржасында Brent маркалы мұнайдың бір баррелінің қазан айындағы бағасы 68 доллардан төмен түсті. Бұл кейінгі бір аптадағы ең төменгі көрсеткіш. ОПЕК+ елдері қыркүйекте мұнай өндірісі көлемін арттыруды жоспарлап отыр. Бұған қоса, 8 тамызда Ресейден атысты тоқтатуды талап еткен Трамптың Мәскеуге қарсы ультиматумының мерзімі аяқталады. АҚШ президенті талап орындалмаған жағдайда Вашингтон Мәскеуге қарсы санкция енгізетінін ескерткен.

Reuters мәліметінше, Владимир Путин Трамптың талаптарына тіке жауап бермесе де, Вашингтонмен қарым-қатынастың нашарлауының салдарын түсінеді, бірақ әскери мақсатқа басымдық береді.